सुप्रिया सुळेंनी अभ्यास केल्यास आंदोलनाचे निम्मे विषय संपतील, चंद्रकांत पाटलांचा टोला

Primary tabs

पुणे : ग्रामीण भागातील बसचा तोटा लक्षात घेऊन प्रशासनाने ही पीएमपीएलने ११ मार्ग बंद करण्याचा निर्णय घेतला आहे. पीएमआरडीए हद्दीतील ४० मार्गांपैकी ११ मार्गांवर एसटीची सेवा सुरू होत असल्याने बस बंद करण्यात येणार आहेत. हे मार्ग बंद झाल्याने पुणे आणि पिंपरी-चिंचवडमधील ११ मार्गांवर जादा बसचे नियोजन करण्यात येत असल्याची माहिती प्रशासनाकडून देण्यात आली. यावर बारामती लोकसभा मतदार संघाच्या खासदार सुप्रिया सुळे यांनी संताप व्यक्त केला आहे. हा निर्णय मागे न घेतल्यास सुळे यांनी आंदोलनाचा इशारा दिला आहे.

गोरगरिबांची मुलं शिकावीत असं पीएमपीएमएलच्या कर्त्या-धर्त्यांना वाटत नाही का? असा प्रश्न सुप्रिया सुळे यांनी उपस्थित केला आहे. या सगळ्या मार्गांवरील बससेवा सुरू ठेवा अन्यथा आपण स्वतः आंदोलन करू, असा इशाराच सुप्रिया सुळे यांनी दिला आहे. सुप्रिया सुळे यांच्या या इशाऱ्यानंतर पुणे जिल्ह्याचे पालकमंत्री चंद्रकांत पाटील यांनी त्यांना प्रत्युत्तर दिले आहे.

माझी सुप्रिया ताईंना विनंती आहे त्यांनी कोणत्याही विषयाची बसून माहिती घेतली तर त्यांचे निम्मे पत्रकार परिषदेचे विषय संपतील आणि निम्मे आंदोलनाचे विषय संपतील. करोना काळातील आणि एसटी संप काळात सुरु झालेले मार्ग बंद करावेत, असे पत्र एसटीने दिले आहे. त्यामुळे हे मार्ग बंद करण्यात आले असल्याचे चंद्रकांत पाटील म्हणाले आहेत.

दरम्यान, बारामती लोकसभा मतदार संघाच्या पुरंदर तालुक्यातील सासवड, जेजुरी, दौंड तालुक्यातील पाटस, मुळशी तालुक्यातील पौड पासून मुठा गाव, खडकवासला विधानसभा मतदार संघातील पानशेत, वरसगाव या मार्गांवर गेल्या एक दिड वर्षांत वर्षांपूर्वी पीएमपीएमल बससेवा सुरू करण्यात आल्या आहेत. एसटीची अपुरी सेवा आणि खासगी वाहनांचे भरमसाठ भाडे अशा कात्रीत सापडलेल्या याभगतील शेकडो प्रवाशांना बस सेवा सुरू झाल्यामुळे मोठा आधार मिळाला आहे. शालेय तसेच महाविद्यालयीन विद्यार्थी, दूर अंतरावर काम करणारे कर्मचारी, आरोग्य सेवेसाठी शहरात जावे लागणारे रुग्ण इतकेच नाही, तर मार्केट यार्ड आणि मंडई मध्ये नित्यनेमाने येणारे किरकोळ भाजी विक्रेते तसेच शेतकऱ्यांनाही या बसचा मोठा आधार निर्माण झाला आहे, असे सुप्रिया सुळे यांनी म्हटले आहे.

हे मार्ग होणार बंद

स्वारगेट ते काशिंग,

स्वारगेट ते बेलावडे,

कापूरहोळ ते सासवड,

कात्रज सर्पोद्यान ते विंझर,

सासवड ते उरुळीकांचन ,

हडपसर ते मोरगाव,

हडपसर ते जेजुरी,

मार्केट यार्ड ते खारावडे/लव्हार्डे,

वाघोली ते राहुगाव,

पारगाव सालु मालू ,

चाकण,

आंबेठाण चौक ते शिक्रापूर फाटा,

सासवड ते यवत